اعترافات مصور فيديو إبطال سحر مؤمن زكريا للنيابة: “جه القرافة ومعاه شيخين” – التقرير

يواصل  “الدستور” نشر نص تحقيقات النيابة في القضية رقم 6904 لسنة 2024 جنح الخليفة، بشأن فبركة واقعة العثور على سحر لـ مؤمن زكريا، 36 سنة، لاعب كرة قدم سابق، ومنها أقوال المتهم محمد عمر، مصور الفيديو الخاص بإبطال السحر واستخراجه من المقابر.

س: ما قولك فيما هو منسوب إليك من أنك متهم وآخرين بإذاعة أخبار وإشاعات كاذبة عمدًا؟

ج: محصلش.

س: ما هي ظروف ضبطك وعرضك علينا؟

ج: اللي حصل أن تقريبا الأربعاء اللي قبل اللي فات في مقابر عيلة مراتي أمينة في الإمام الشافعي الخليفة.. رحت أجيب مراتي لقيت رمضان ابن خالها بيحفر علشان يطلع صبارة عند الترب وهو بيفحت بالخشبة لقي كيس أسود فطلعه وقالي افتح صور فيديو ده عمل.

وتابع: أنا فتحت الكاميرا بتاعة الموبايل وصورت ولقيت العمل عبارة عن لفتين ورق مربوطين بسلك وقماشة رسمة العروسة عليها دبابيس وحاجات كتير مكتوب عليها حاجات كتير وصورة كابتن مؤمن وقالي تعالي نروح نجيب جردل ميه علشان نبطل العمل.

وأكمل: جاب جردل ميه وملح وجردل تاني فيه ميه قعد يقرا عليها شوية قرآن وقالي صور فصورت فيديو وقفلت كلمنا ابتسام مرات محمد إمام وشهرته زيكا، فجت هي وزيكا وساعتها زيكا قال إنه يعرف مصطفى ابن خالة مرات مؤمن زكريا وكلموه وبعدين جه مصطفى على القرافه وريناله الحاجة وبعدين قالي إنه هيكلم كابتن مؤمن وبعدين قالي أنه تليفوناتهم مقفوله وأول م نعرف نوصلهم هنوصلهم وبعدها بساعتين كلم زيكا وقالهم أنهم في اسكندرية وجايين بعد يومين وبعد يومين جه كابتن مؤمن ومعاه 4 أشخاص منهم 2 شيوخ.

وواصل: الشيوخ نزلت وأبطلت العمل وقروا قرآن وبعد كده كابتن مؤمن مشي ورمضان عرف اللي حصل لواحد صاحبه اسمه مودي ومودي ده كلم صحفي وقالو إنه أخو مودي عرف اللي حصل.. ونشر من ورا رمضان ويوم السبت الساعة 7 ونص بالليل.. لقيت رمضان بيكلمني ويقولي أن احمد بيه الكردي عايزني عند بيته.. وروحنا لريهام سعيد الساعة 10 بالليل في مدينة الانتاج الاعلامي وبعد كده روحنا القسم وده اللي حصل.